我阿婆以前唔肯戴助聽器。老媽同佢配最新嘅，因為加拿大唔使錢。但係阿婆聾太耐，啲聲太靚，聽到佢好唔舒服。於是唔用。老媽話個助聽器好貴㗎，迫佢用。阿 婆就話你退咗佢，然後以後都唔敢再要。但係佢就成日「吓吓吓 ⋯ 都唔知你哋講乜」攪到個個都好紋！我番加拿大時探討過呢個問題。我問佢你淨戴著睇電視吖！佢話唔舒服。我問佢點唔舒服。佢話好嘈。我話較細聲啲。佢做比我 睇：
鈎响耳仔嘅助聽器，開關大細聲都放晒响果到。新型號 digital 教聲量可以教得好細緻。但係聾咗好一段日子嘅人，負責聽嘢嘅工能慢慢失去咗 selectively pick up important data 嘅能力。所以，一開始戴時乜 Q 聲都 pick up 晒，鬼殺咁嘈！醫生一定會教佢哋每日戴一陣，戴吓長啲時間，戴吓又長啲時間去 train up 番隻耳。不過個新型助聽器教聲量個制係好 fine 嘅動作先得。老人家已經做唔到 fine tuning 嘅動作。於是一係教到聽唔到，一係扭到去吱吱叫。非常唔舒服！我自已試過。於是我上網搵。Siemens 出嘅一隻超級舊款機：心口一個接收器，插著耳筒。老人家可以睇著嚟教聲量，甚至用接收器隊埋去電視到收好啲。好自主。用AAA電。戴著似 iPod。成功令我貪靚嘅阿婆戴！我有時對著佢部接收器細細聲講嘢，行街好多人見到都走埋嚟問邊到買。
後嚟阿婆不在人間之後，我捐咗個助聽器。
