食開口水雞呢間店好多普通話人去，除咗因為啱佢哋口味，又平，近港大亦係好關鍵。不過通常學生會買走，但間唔中都會見到頭上亂草，明顯係 T-shirt 孖煙通 當睡衣，踢拖嘅學生哥堂食。
話說尋日去辦差事，之後食口水雞。搭枱嘅應該係一對拖友，女嘅聲音嬌柔有少少口音。坐低講下八卦商議下食乜，叫咗，然後好靜～ 而我亦覺得有啲怪怪 -- 男嘅忙住玩手機，女嘅就呆呆咁望住我。
食麵時，嬌柔聲嘅女發出嘅通渠聲效果（my pet peeve）！我 reflex 咁望下佢。佢用嬌柔嘅聲同男嘅唔知講乜，男嘅回應「唔係呀！」細聲咗一陣咁多，通渠就繼續！
我唸我唔似一個講禮儀嘅人，但係就會睇 etiquette 嘅書。我去食飯，睇醫生，總之約咗人都會閂咗手機鈴聲。如果你要我望住你玩手機，我大概會話「你約我嚟睇你玩手機？」。有 urgent message 要覆唔緊要，講聲。不過今時今日，呢啲嘢可能不合時宜。對方可能會話，你都可以玩手機咯！
食嘢時發出聲係難免，但都唔使咁放咁爽嘅。尤其係食完時嗰啲 jip jip jap jap！攞命 3,000！無人有興趣想知你牙縫之間有啲咩揭住咗，要用 9,000W 嘅吸塵機嘅吸力去 jap 佢出嚟，好唔好！！！
我明白食麵食意粉總會唔多唔少索索聲（勸拍拖初頭應盡量避免去食呢啲），不過吸咁多空氣入胄呢，小則放屁，大則傷腸胃。有人同我講，日本人係咁食麵㗎！咁你係咪日本人呀？日本人咁做重點唔係要索索聲；重點係令周圍嘅人感覺良好 — 煮得好好食，同大家食好好味嘅嘢好開心！依家你啲索索聲令禾巧唔舒服囉！
最後，口中有食物時唔好講嘢，要講掩住口講。無人有興趣想知你口入面啲食物咬成乜嘢樣，唔該！
沒有留言:
發佈留言