< Diagnosis 診斷 >
過咗三年，再驗出 CIN2 高度病變。由於上次 LEEP 已經切咗好大片子宮頸，可以切嘅地方都冇乜剩，所以唯有切除整個子宮。即使堅持淨切子宮頸都有機會切到第二到，到最後都係切除整個子宮。女(婦科)醫生話一直食住避孕丸(冇停藥冇嚟經)，冇行房，打埋子宮頸癌疫苗針都咁快復發，隻菌都好惡。但係女醫生(廖)唔做微創(腹腔鏡手術)，而且今次去嘉諾撒，冇得去養和。我鐘意養和多啲。住 4 日醫院，收 $30,000，total 大概 $80,000！女醫生話去養和要加多 $10,000，做微創就 double 個價。就係咁打消咗我去搵 2nd opinion 嘅念頭。跟著女醫生又講關於微創啲好得人驚嘅嘢。我更加唔敢唸。
< Choosing Surgeon 選擇醫生 >
但後嚟聽朋友講佢個客做微創，第二日已經可以出院。陳煥堂醫生(養和醫院副院長兼婦女健康及產科部主管 I know about this after my surgery)收佢 $40,000。Okay，一係女醫生唔 update，一係陳醫生收友情價。因為我比較喜歡養和，plus，從來都應該揀微創 over 開刀！我有好多學生媽咪都係護士。佢哋比到好多有用嘅資料我。太好啦！約見譚家輝醫生。譚醫生本响瑪麗，被養和撬走，明啦！我將一大堆病歷比佢睇，再由盤古初開開始講。佢話做完 LLETZ 之後依然檢到輕度病變即係清唔晒，一定係唔知籬埋响邊。要再照陰道驗清楚，一併清除！可能係檢查時鴨嘴遮住果個位。果真陰道邊黐著子宮頸檢出有。
女醫生用鴨嘴，我都爆裂咁痛。譚醫生用最細嘅鴨嘴，我就冇痛。我嘅經驗(包括响加拿大時)係叻嘅醫生，手勢好，你只會 feel 到鴨嘴凍，係唔會痛㗎！而雖然女醫生可能冇咁好手勢，但冇乜大問題就費事轉嚟轉去啦！重有，睇醫生要夾同有多經驗，唔好介意係男定係女。醫生係專業㗎嘛！
< Preparation 準備 >
有 insurance 嘅同 agent 講清楚先。我上次做完 LLETZ 之後，佢都講明下次婦科嘢唔包。
因為考試响 6 月，冇學生會補習，可以安心休息。於是約 6 月。姑娘幫我 book 星期五。(覆診星期一發現超多人，唔怪得知姑娘幫我 book 星期五。) 我約定星期三朝早剪頭髮，剪到好短好短，唔駛點打理。因為我個人係要日日洗頭，萬一洗唔到，我要將果種唔舒服減致最低。如果長髮又貪靚嘅我提議帶條 bandana、絲巾之類包頭。下晝就去做 facial。買定晒狗糧同尿墊。再買衛生巾同紙底褲。我做嘅係 laparoscopic vaginal assisted hysterectomy，即係用腹腔鏡切，然後「生」個子宮出嚟(由陰道出)。所以 shave 咗先。其實 trim 已經夠。預備一兩件鬆身睡衣、拖鞋(可以著埋入去 shower 果隻)、抹身毛布。醫院會比牙刷牙膏、梳、襪、小小毛巾、Seba 洗頭水同番梘。結果係原封不動咁拎番屋企，因為我比較咋，由入院到出院都重係著住同一件醫院袍！洗面都係姑娘幫我準備。根本就唔會唸到抺身冲涼！帶定披肩。ding ling dung lung 要除，指甲油抺走，戴眼鏡唔好戴 contact lens。姑娘成日問我有冇假牙，所以有假牙嘅朋友要問姑娘點算，我都唔識。我冇工人，所以洗定晒衫，燙好晒一件過嘅裙入院，覆診同出街著。一件過鬆身短裙，尤其方面去厠所。人字拖入院，走嘅時候方便啲。
我建議入院前、禁飲食前最後一餐食清淡啲，飲就飲水。第一，唔想個口一陣味；第二，萬一消化出現問題，肚痾，但係又禁飲食，不但辛苦，而且會缺水。咁好難攪。如果唔想麻煩人，可預備定四日嘅叮叮餐放响冰箱。其實都唔係好食得多，因為我放唔到氣/屁。
我比較好彩。My sister offered help, but I declined since she had to come from Shanghai and has a year old baby. I have a supportive husband who was willing to stand by until I went to sleep. And I was pretty okay handling things by myself and with the help of nurses. 有人在傍幫忙好緊要，如果唔係就要入一等一嘅醫院等護士幫。因為一直都落雨，第二晚重行雷。我可以安心叫我老公番去睇包包(狗)，我有姑娘幫我得喇。不過又唔好比姑娘寵壞！
這不是個社交 or girl talk 嘅時候。After the operation, you'd feel and look crappy! 最重要係休息。雖然你有機會感覺良好，但响藥物嘅輔助下，你唔知身體承受嘅壓力其實好大。我 Whatsapp 最好的幾位朋友，通知他們不用找我。但因為我手術响星期五，個個都想星期六嚟。但係都冇乜精神去應付，要安排佢哋响下晝輪住嚟，同買唔同嘅果汁或細份生果(strawberry or kiwi)嚟。因為食唔落嘢，太多生果會食唔切。唉，好攰！
我有一個朋友好唔識做，一知道就話要星期五、六、日(pre-op)嚟打攪我。話同我傾心事。我根本都心事。我相信要做大手術嘅人，手術前後不但需要有足夠休息，亦好需要平靜！你或者好心想表示關心，但咪一廂情願，反而比壓力病人。
< Going to Hospital 入院 >
7 點登記。5人房，又係窗口位。窗口位貴啲㗎！最平係$880，我就$990。我估留得耐嘅都會瞓最平嘅，所以冇我份。但係可以見到陽光對我好緊要，心情會好啲。因為禁食，好凍，披肩呢個時候好有用。姑娘同我量血壓呀，kic-lic-karc-larc，問一大堆有冇敏感呀、食唔食煙呀、家庭病歷呀......
手術11點做，我瞓咗一陣就有護士入嚟幫我放便便，抽血。差不多9點我就換上袍。同上次差唔多。坐輪椅，問有冇敏感、做咩手術、有冇假牙......，換床(間房好凍)，等 theatre。大概有三個人嚟問吓嘢，包括麻醉師，醫生又嚟問吓緊唔緊張，凍唔凍之類，總之就係等緊 theatre 啦！唉，我一緊張就有便意(no.1)。好煩！
< Operation 手術 >
嚟啦嚟啦！有人嚟推我張床。經過一條放滿雜物嘅走廊，緊使可比張床過。入到房，爬過另一張似雞蛋盒狀嘅海綿嘅床(其實有啲似工廠入面啲輸送帶)。鬆咗件袍 同褲。我冇帶眼鏡。但我見到左下腳房角有一座 giant elephant 嘅物體用布㩒住。可能係果啲成個人入得去嘅 MRI 呀、laser 呀果啲機。近啲就係醫生棟响樹等，手响後翹。右下腳有一座長頸鹿咁高嘅嘢。四圍啲人好忙咁聲。好大好凍嘅雜物房咁。麻醉師出場啦 -- 又！伸出右手，我怕針，所以唔敢望。佢會好似講波咁一邊做一邊講你知佢做緊乜。我只係記得佢話打麻醉藥會有啲凍。冇錯，一陣寒氣包住手腕一直漫然到 elbow。令我唸起死刑。又比啲氣我聞。我要聞到第二吓先瞓。
嘩！醒果吓，肚以下，膝以上，所有嘢好似放過落 blender 撈埋一碟嘅感覺！痛，好唔舒服，但可以忍受，因為好攰！而右下扒，右 pat pat 勁震！我有試放鬆，但不受控制。放棄，好攰！由佢震......
手術時會將我放成 pat pat 高過頭，再放入 CO2 氣入肚。目的將其他器官盡量推開，等醫生可以睇清楚啲個子宮，而且唔會咁易整到其他器官。CO2 氣放入時已經整暖咗，如果唔係醒時就會成個人震。係可以震到成張床都郁！咁好危險，會令傷口爆開。所以，手術前身體狀態要好。手術前多休息可以令身體响手術後冇咁辛苦。
< Post-Operation 手術後 >
今次我乜都唔記得。再醒時已經响病房，比人好似移動海豚咁搬上床。然後我又唔係好記得點嘞。我醒時，感覺唔錯，就嘗試坐起。點知心跳得好勁，又喘氣，又有啲暈。姑娘將床放番平，比我聞氧氣。醫生見我就解釋麻醉後，血管反應慢，血壓下降，都係乖乖瞓低休息吓。:b 嘻嘻！事實上，又鈍又攰。乜都 feel 唔到。唔渴唔餓，所以，嚫啲止痛重有效好好休息！
半夜就慘啦！因為本身有腰痛，唔能夠臥瞓太耐，而且身體發熱令頭好痛，止痛又開始 wear off。叫姑娘。姑娘比止痛藥我，幫我攞走一張氈，重幫我轉身！嘩，太好啦！重話要多轉身，想轉身就叫佢哋。雖然唔係幾好意思，但都再叫多一次轉身。點解我冇法自己轉身呢？第一，我一郁啲氣(CO2)就會沖上膊頭同要側身嘅嗰排ribs。比抽筋重要痛。第二，我右手插住 IV，下面插住 catheter，我亦冇睇或摸過傷口，究竟有幾多傷口、傷口响邊都唔知，我唔係好敢亂郁。
終合放氣(CO2)嘅 ideas，以我認為最有效為先：
1. 轉身
2. 行，令腸郁番（而且可防手術後便祕）
3. 食
4. 飲熱嘢
舒緩 wind pain：
1. 按摩
2. Heat Pad
網上好多都話要行、要行、要行，加上長時間一個姿勢好辛苦，所以我好想好想掹晒啲喉。點知醫生做手術要做到 3 點！好彩醫生有交帶老(啲)護士，可以掹晒啲喉試吓自己行，重可以食嘢。點知等咗好耐都未嚟幫我掹喉。一掹我就話要起身，成班護士走入嚟叫我唔好。但係我已經跪咗响張床到唞緊氣！都已經舒服好多啦！我話要小解，姑娘比個兜我瞓响床去。真係怪到我爭啲去唔到。可能我之前想暈，所以啲姑娘驚我急得濟，叫我試吓坐住床邊先。我坐咗一陣，襯佢哋走咗自己試吓慢慢企起身。點知忽然有個護士入咗嚟， 問我點落床。落床咪落床咁落囉，我都唔知點答佢。我唸之前 I must look really bad。醫生見到我企咗响床邊就叫我扶住行，因為可能未恢復體力同會腳軟。我就圍住張床行。我個肚漲到好似想爆！但啲屁屁太不屑。加上陸陸續續有朋友嚟，我好似recorder咁重復又重復講同一樣嘢，好快我行兩行又好攰。老公嚟啦！佢叫嘢食，我黐佢少少。漲到頂住，實在食唔落。陪我去走廊行咗一個圈，痛係未停過。番上床，唔知 做咗啲咩動作，啲氣 attack 我右邊 shoulder and ribs。痛！痛！痛！痛！痛！(乘一打！）有老公就緊係叫佢按摩啦！好啲之後，行雷。我叫佢快啲番去陪包包，有事我會搵姑娘㗎啦！痛！痛！痛！將張床調到45度角倒，再墊兩個枕頭，側側哋身，終於可以瞓得著。瞓咗兩個鐘倒，痛！痛！痛！咩難睇到嘔嘅姿勢，正常時冇可能唸到嘅姿勢，我都試過。就係痛！痛！痛！試到好攰再瞓個幾鐘，瞓唔到嘞。雖然好攰，但唔攪掂啲氣就唔會有覺好瞓，冇啖好食，所以再行。因為間唔中會發熱所以著多件神褸就夠暖。我出絶招，坐凳伏响枱到瞓。冇咁辛苦，起碼瞓得著。瞓咗一陣，姑娘入嚟量血壓。再瞓，我唸都瞓咗個幾兩個鐘倒，嗝咗好幾啖氣，再加兩啖長嗝。嘩！好舒服呀！再行多陣，幾個小屁屁。再伏响樹瞓吓。跟住醫生到。出得院啦！哈哈哈哈！
< 番屋企 >
99 跟我番屋企！！如 Dr Lauren Streicher 話齋，99 唔係一個 best choice！
好攰，我唔得閒招呼佢，上房瞓。啲氣好痛，咁瞓咁瞓咁瞓咁瞓咁瞓 ...... 終於瞓到。中途發熱，令頭好痛！起身走動吓啦！99 開始煮飯。
我介紹 3 個 chopping boards 佢認識：瓜菜生果用嘅、熟肉如火腿、生肉。刀亦有分菜刀或切肉刀。佢切完肉冲水再切菜！救命！既然你係都唔肯分開用，咁係咪應該切菜先再切肉呢？
我冇眼睇。閃！
攪咗一場大龍鳳，其實都好普通飯餸，而且我冇胃口。地下油淋淋就等鐘點後日嚟拖。我第二日重新洗過晒啲嘢！發現用咗包包隻不銹鋼碟蒸魚！哈哈哈哈！
第 8 日覆診。
醫生：你個肚重好漲喎。
我：我不嬲個肚都漲咖啦。
醫生：冇咁漲。唔係肥嚟咖，係氣嚟咖！
我：咁就真係好消息！
重有左大比內側分別有痺、痛、痺 + 痛(有啲精神分裂)。醫生話係正常。開窿時整到附近神經，痺跟著痛跟著好番。點知成兩個月後先開始痛。係電擊咁痛！
正如 Crabby 講，休養期真似坐過山車！5、6日好哋哋，我重掃地洗衫......冇啦啦第10日倒，個胃以及圍住個身一圈嘅範圍痛到 M come 咁— 瞓唔係、扒唔係、坐唔係、i 唔係、踎唔係、企唔係。唯有行會好啲啲。於是我唔敢停，係咁行，好攰呀！就係咁過咗兩三日。一食嘢就胃痛！
過咗兩個禮拜多啲先可以叫正常。但依然有胃痛。
Useful Websites:
<關於腹腔鏡子宮切除術 About hysterectomy>
http://www.thewomens.org.au/totallaparoscopichysterectomy
What You Need to Know About Hysterectomy
http://my.clevelandclinic.org/services/hysterectomy/hic_what_you_need_to_know_about_hysterectomy.aspx
Dr Lauren Streicher excerpts from The Essential Guide to Hysterectomy (【子宮切除術的基本指南】一書摘錄)
http://drstreicher.com/excerpts-from-the-essential-guide-to-hysterectomy
<康復>
Hysterectomy Recovery! A Cranky Fitness Guide (子宮切除術恢復！一個古怪健身指南)
http://www.crankyfitness.com/2011/03/hysterectomy-recovery-cranky-fitness.html
How to Sleep In Pain
http://www.webmd.com/sleep-disorders/living-with-insomnia-11/pain-and-sleep?page=1
