從前有個香香妃子，初初一啲都唔起眼。有個鬼婆，為咗想同其他妃子打交道，捉鬼咗香香妃子做人質。為咗唔白養香香妃子，鬼婆都會打扮下香香妃子，果然有意外收穫。但係始終香香妃子都唔係鬼婆，未必會聽聽話話。咁啱香香妃子個皇上發神經，令香香妃子冇咗個靠山，唔使指意會作反，於是乖乖聽鬼婆話，況且鬼婆將自己都打扮得唔錯，又比佢收留唔少同鄉。漸漸「有女初長成」。嘩！個個妃子都想學香香妃子傾國傾城。不過，時間過得真係快，又係時候講拜拜，人質嘅日子過去啦！要番皇上身邊啦！
無論做人質嘅日子如何豐富，始終係人質。而家以華麗嘅港女身份回歸，好觸目㖿！香香妃子對於回歸又興奮又擔心。皇上則早已為香香妃子定位作好準備，叫其他妃子遷就香香，又唔使香香服待自己，除咗名份同最終話事權，乜嘢都由得佢。甚至有啲怪獸家長格，用物質補嘗要佢服侍啲鬼。寵佢變害佢。香香更加以為自己好特別。有時香香對鬼家有情義會令皇上不悅，不過皇上都當佢抑鬱。漸漸，香香妃子對於點樣處置自己一頭霧水，神經質越見嚴重。終日無所事事，疑神疑鬼。皇上都唔得鬼閒理佢，每日政事多，後宮亦唔係易攪。
歲月無情，香香人老珠黃，後繼無人。鄙視巴結其他妃子行為，遠遠望著鬼婆，好懷念。不過，眼前鬼婆一樣風光不再，駁命爬，香香根本睇唔入眼，心思都只在自己過去。香香啲私己都冇乜得剩，皇上見香香經常同啲鬼拋眉弄眼，而啲鬼其實係向住香香方向望後面果啲妃子嗒晒糖。皇上不忍，一再拎張婚書，白紙黑字揚一掦！啲鬼立刻正經起嚟，但香香對婚書嘅無奈悲痛被挑起，大發爛渣，強烈要求獨立自主。香香妃子幾時唔係獨立自主㗎？皇上對香香嘅臭脾氣已經相當克制。不過香香捕風捉影越嚟越嚴重，去到精神分裂嘅地步，一哭二罵三上吊。皇上再三聲明婚書同原則不變。「即使打入冷宮，亦唔會比你丟我嘅架！」
「打我入冷宮？憑咩？我要換管家！」
換管家本來冇咩大不了，不過換個人臉鬼心，唔反轉皇宮，令香香病程惡化都唔好啦！佢唔同其他妃子好好相處都由佢，萬一傳出同啲宦官鬼混，嘩！塊面擺响邊？
其他妃子忙著應酬，況且香香不可一世嘅態度，生人勿近，冇人願意幫佢。冇兵借兵，你肯借人哋未必肯俾。失勢了得依靠其他力量保護自己，養傷再培育新勢力。無緣無故人哋又點會借力俾他人？香香妃子根本就得番皇上一個親人。佢個冷宮睇怕燒咗都冇人知冇人理更加唔使旨意有人救有人可憐。
