坐小巴可以高高在上咁望吓隔籬車 -- 一 BMW 女司機正以反手指努力挖鼻。咁唔多唔少有啲嘢黐响手指，所以順理成章用口清潔手指 ...... 但係黐咗口水嘢手指又點清潔呢？
地鐵一男子靠柱企，打咗個乞嗤，鼻郁郁 – 有鼻屎！撩！鼻屎會點處置？一定係彈，必須實佢彈咗去邊。黏得擠，彈嚟彈去都彈唔到。於是 hi 响條柱到。事後走人。第二個站嘅人入嚟「挨挨笨笨」，鼻屎去向未明。
好多人成日為咗懶、方便，作出種種理由而唔洗手。買新衫一樣唔洗就著。想像一下車衣工人因毛四處飛而打乞嗤，佢會唔會用手掩住個口？拎咩面打乞嗤？啲衫係放响地吓或從未清潔過嘅膠兜。Retail 時，你又試我又試，成身汗試嘅又有，有臭狐試嘅又有，去廁所唔洗手試嘅又有，周圍挨身挨世 hi 到鼻屎去試嘅又有 ......
窮嗰時，菜花、食物掉落地都照食。無可厚非。但一旦環境許可，係咪都應該全面進步一吓，改善一吓呢？為咩要將以前無可奈何嘅情況變成壞習慣？洗個手真係咁難咩？汗淨啲衛生啲好辛苦咩？講真，有幾多人窮到洗手都比唔起錢？
唔少香港人，甚致靚女，食嘢時擘大口，唧唧聲，好恐怖。佢哋會死撐「日本人係咁喎*」，「人人都係咁啦」，「個口細」，「難高貴」...... 唔知唔緊要，知道咗點解又唔肯改善呢？
你想人哋點睇你，你必須作出相對嘅行為。你想人尊重你，請自重。你想人睇得起你，你要有嘢比人睇得起你。你揸 BMW 但你食屎！想嘔。
沒有留言:
發佈留言